Ágúst í Kaíró

Køben

Í morgun flaug ég með Iceland Express til Kaupmannahafnar. Fór í loftið klukkan hálf-átta heima. Þoli ekki svona morgun flug. Vaknaði klukkan fimm í morgun og fyrir vikið hefur maginn ekki verið góður í allan dag.

Lenti hér um hálf-eitt leytið að staðartíma og tók lestina niður á Hovedbanegaard. Aðkoman að þeirri lestarstöð minnti mig óneitanlega að koma með Stansted lestinni inn í Norður-London, nema hvað við hrörleikann og veggjakrotið bættust nokkrir yfirgefnir lestarvagnar og annað drasl í boði DSB. Óneitanlega minntu Dönsku járnbrautirnar á eina af vídjóspólunum sem maður var látinn horfa á í dönskutímum forðum daga.

Ég hef ekki gripið til enskunnar ennþá og danskan hefur reddast, þótt ryðguð sé. Aftur á móti hef ég heyrt íslensku talaða margsinnis í dag og Íslendingar virðast vera helmingur túristanna á Strikinu. Bara á leiðinni af járnbrautarstöðinni að hótelinu, sem er ca. 500 m., mætti ég tvívegis Íslendingum.

Það er skítaveður hérna í dag. Rigning og rok. Skítkuldi. Eftir að hafa arkað um allt nágrennið í rúma fjóra tíma ligg ég núna undir sæng og reyni að ná upp hita. Náði sem betur fer að halda mér þurrum með því að vera í hverri flíkinni yfir aðra. Þegar ég fór að heiman til Keflavíkur var hagl og það er víst búið að vera frost í allan dag á Íslandi.

Líkt og lög gera ráð fyrir fékk ég mér pulsu í einum af pulsuvögnum borgarinnar. Valdi mig vinsælan vagn og taldi mig þar með öruggan um ágætan bita. Fékk einhverja verstu pulsu sem ég hef bragðað. Minnti á SS-pylsu hitaða upp í örbylgjuofni daginn eftir síðasta söludag. Eftir að hafa labbað í rigningunni lengi lengi ákvað ég að gefa pulsusölum Kaupmannahafnar annan séns og fékk mér pulsu í öðrum vagni. Hún var bærileg, enda var ég orðinn allt verulega svangur. Fékk mér aðra og sittist svo inn á kaffihús og skrifaði á póstkort. Þar var kaffikrús á hillu innan við afgreiðsluborðið og mynd af Bill Clinton. Á spjaldi framan á hillunni stóð: Bill Clinton drak af denne kop den 20. marts 2001 her i steden (ef ég man þetta rétt).

Nú þarf ég að fara að finna mér eitthvað að borða. Ætli ég fari ekki á suður-asískan stað hérna rétt hjá. Reyni svo að komast aðeins á internetið, opna póstinn og kíkja kannski aðeins á MSN. Ætla svo snemma að sofa. Flug klukkan eitt á hádegi á morgun. Lendi í Kaíró klukkan að ganga sex að kvöldi þar. Tímamismunurinn er einn klukkutími (altso 3 tímar á undan Íslandi næstu daga, þangað til vetrartíminn minnkar muninn í 2 tíma), svo þetta er rúmlega þriggja og hálfs tíma flug. Klukkutímanum lengra en Keflavík-Køben.

Mikið verður gott að komast úr rigningunni í mannsæmandi hita. Lendi eftir sólsetur, þannig hitinn verður um 20 stig líklegast. Annars fer hann yfir 30 gráður núna í Kaíró yfir daginn, búið að vera í heitara lagi. Næsta mánuðinn fellur meðalhitinn um nokkrar gráður.

Hvað um það, ég þarf að finna mér einhverja næringu.
Agust skrifaði 18.10.04 19:30 (GMT+2)
(Íslenska)